Sniglablogg

Réttir.

Nú verður talað um rétti. Allskonar rétti. Forrétti, aðalrétti og eftirrétti. Undirbúningur verður að vera á hreinu fyrir allar veizlur. Vera búið að taka til, smyrja, strauja, brenna diska og að sjálfsögðu mála og jafnvel bæði krulla og slétta. Og svo verður ákveðin tilhlökkun að vera til staðar. Ef áfengi á að vera með er gott að vera búin að ákveða hvort áfengið á að vera í mældu eða ómældu magni. Kokdillar og krúsídúllur eru miklir ísbrjótar. Humar mætti gjarnan vera fyrsti réttur. Jafnvel Humar B. Lauksson. Ekki þykir mér fýsilegur kostur að notast við kræklinga. Ekki einu sinni í forrétt. Ef íslenska lambið á að vera í aðalhlutverki er gott að vera búin að undirbúa það létt svo ekki þurfi að notast við aðferðir eins og svokölluð "vegalömb" þ.e. það sem á vegi manns verður. Ef hins vegar nautið á hins vegar að leika "Roy" er gott að steikja það ekki meira en svo að síðasta andvarpið sé á hreinni íslenzku. Ekki samt svo léttsteikt að flótti sé gerlegur. Sauðir koma ekki til greina. Kjúklingar eru ekki veizlumatur, heldur eingöngu ætlaðir sem snakk. Í þessu tilviki erum við að tala um að ekki séu hænur fýsilegur kostur og alls ekki tilhlýðilegar í þessum félagsskap. Gætu jafnvel lent fyrir því að missa höfuðið. Þá er komið að eftirréttinum. Það er ekki nauðsynlegt að vera með eftirrétti. Ekki nema allir veizlugestir séu á eitt sáttir með það. Hér verða þó taldir upp nokkrir réttir sem ekki eiga við í veizlum... Eftirréttir með miklu áfengi að staðaldri, réttir sem farið er að slá í, illa eldaðir réttir, réttir sem eitthvað vantar í, réttir sem margir hafa byrjað að borða en spýtt út úr sér, réttir sem eru bragðdaufir og illa útlítandi. Veizlugestum er bent á þá staðreynd... að vondur og ljótur matur getur mögulega litið vel út ef um mikla svengd er að ræða og skal það fyrirgefið ef viðkomandi sýnir almennilega iðrun. Mannasiðir skulu í heiðri hafðir. Slagsmál eru eingöngu leyfð ef um áður étna rétti er að ræða, og skyldu þá veizlugestir gjarnan taka sig saman og bola þvílíku útaf matseðlinum. Ekki má þó fyrirfram skipleggja slíkt athæfi. Reglur þessar skulu ekki brotnar allar í einu. Ekki má í þessari veizlu, hvorki á einn né annan veg, borða af diskum annarra og er ekki umsemjanlegt.